Sajak Prabu Surawisèsa
1521-1535
(Sajak Aan Merdeka Permana)
Sampurasun !
Kula Surawisèsa
Ti payunna kubumèn Karaton Pajajaran
Ayeuna Jayaperkosa
Singkur ti unggal pribadi
Jeung ti Jalma nu teu miyakin
ka diri kaula Jayaperkosa
Mangkadè
lèngkah ulah gumayah
geus loba
nu leumpang gancang tikusruk
sabab poho teu silih tungtun
Naha teu ngaraos?
Jayakeun deui indung suku
Anu ngawadah ku kanyaah
cangreudkeun deui jalma sunda
Tina Prilakon kasundaan. ***
Sajak Sri Baduga Maharaja
1482-1521
(Sajak Aan Merdeka Permana)
Sampurasun ka sakumna dulur
Nu netep di ieu lingga
Kula teu welèh munjung kanu kanyaah
teu welèh asih kanu miasih
ka Sang Pangasih
ka Sang Pangasuh
Mangkadè
dunya geus singsak
rèas cahyaningna
susah tuturkeuneun
ngan mun geus euweuh tuturkeuneun
Dosa, siah!
Dosa, siah!
geura hadè
geura hadè, putu sakabèh ! ***
Samèmèh Trèt
(Sajak Atèp Kurnia)
Kakarak gè rèk Trèt
Kojèngkang kalangkang Liwat
"isuk deui wè nya," kitu anu kapireng
samèmèh ngiles
2006
Di Toko Buku
(Sajak Atèp Kurnia)
Beungeut - beungeut buku
Ibarat gula - gula di toko gulali
2006
Catetan Keur Kurt Cobain
(Sajak Toni Lesmana)
Mindeng pisan urang teu hayang lilir
Tina Impian. Da jamparing langgeng rungseb
Tapi candu ukur salenyapan
Siga cinta nu ngan sajorèlat gelap
Mindeng pisan urang teu hayang lilir
Namatkeun lagu. Sanajan sewu wirahma
Ngulangkeun kolèbat pedang
Daun - daun maluguran
Waktu ka mana teuing lèosna
mun anjeun kiwari lilir lebah impian sajati
panggalindengkeun tirisna langit
hariringkeun Rusiah Cinta
Nu pangweningna
Budah
(Sajak Nazaruddin Azhar)
Urang lir budah sagara
nu teu akaran
ngangkleung terus pareupeus
sapanjang keusik
Angin ririh mapatkeun rajah pamunah
pikeun kaasih nu can merenah istirah
2003
